Fjarðarheiðargöng

Bifreiðar björgunarsveitarinnar Ísólfs við erfið akstursskilyrði mynd: Björgunarsveitin Ísólfur

Einangrun Seyðisfjarðar rofin.   

*Enginn þéttbýlisstaður, með viðlíkan umferðarþunga að og frá um háan fjallveg Fjarðarheiði (600 m), hefur beðið jafn lengi eftir varanlegum öruggum heilsárs samgöngum.  Vegna þessa hefur allri þróun og eflingu atvinnulífs sífellt verið ógnað.  Fjárfestar sniðganga staðinn, hann einangrast  og öryggisleysið sem fylgir leiðir til atgerfisflótta.  Nú er mál að linni ef ekki á verr að fara. ( sjá umferðartölur á vegagerdin.is)

*Ef skoðuð er þróunin  hjá „einagruðustu þéttbýlisstöðunum“ frá 1970 til dagsins í dag þá er hún þessi:
Vestfirðir: Bolungarvík -Ísafjörður  = gerð þrenn jarðgöng.
Norðurland: Siglufjörður = gerð tvenn jarðgöng.  Ólafsfjörður = gerð tvenn jarðgöng.
Austurland: Neskaupstaður(Oddsskarð) = gerð tvenn jarðgöng.  Seyðisfjörður(Fjarðarheiði) = engin varanleg lausn.

*Færeyskar fólks-og bílferjur hafa  siglt frá 1975 til og frá Seyðisfirði  eða í 42 ár.  Norröna siglir allt árið frá 2003 og kemur vikulega til hafnar á Seyðisfirði.  Árlegur farþegafjöldi fram og til baka nemur því að  fylla rúmlega eina Boeingflugþotu alla  virka daga ársins.  Vöruflutningar aukast stöðugt.

*Höfnin er langstærsta skemmtiferðaskipahöfn Austurlands.  Fjórða á landsvísu.  45 skip koma í ár.  Það stefnir í 60 skipakomur 2018.  Á einum sólahring hafa t.d. komið 3 skip með um 5000 manns.  Margir fara dagsferðir til Héraðs og til baka um Fjarðarheiði.  Höfnin, með öfluga móttöku ferðafólks og sjávarafurða, er lífæð  staðarins.

*Egilsstaðaflugvöllur er varaflugvöllur fyrir millilandaflug að og frá Íslandi með vaxandi möguleikum í flutningum.  Samstarfs- og  samlegðaráhrif við Seyðisfjarðarhöfn, sem er önnur gátt inn og út úr landinu fyrir ferðafólk og vörur, er því augljós.  Öruggar heilsárs samgöngur milli flugvallar og hafnar skiptir þar megin máli.

*Talið er að um 80% umferðar  yfir Fjarðarheiðina sæki til Héraðs, á flugvöll, áleiðis norður í Mývatnssveit, suður Öxi eða til Borgafjarðar eystri.  20% umferðarinnar  sækir yfir Fagradal  í Fjarðabyggð og áfram suður firði.

*Ferðamálastofa áætlar að  til Seyðisfjarðar komi 275.000 ferðamenn í ár og um 17% þeirra gisti á Seyðisfirði.  Íbúar á Seyðisfirði eru 650.  

*Með Fjarðarheiðargöngum verða ca 18-20  km á flugvöll Egilsstöðum. Fram og til baka 36-40km.

* Fjarðaleiðin svonefnda, suður úr Seyðisfirði, leysir ekki Fjarðarheiðina. Hún  kallar á tvenn jarðgöng (alls 12.0 km) með 4 gangamunna.  Til Mjóafjarðar ( 5.5 km) og áfram (6.5 km) í ný Norðfjarðargöng til Eskifjarðar og Reyðarfjarðar, yfir Fagradal til Egilsstaða alls  um 70 km.  Það gerir 140 km fram og til baka.  Fyrir akandi umferð er það lenging, miðað við  Fjarðarheiðargöng, um  100 km.  Þeirri leið hefur því alfarið verið hafnað sem næstu forgangsframkæmd í jarðgangagerð á Austurlandi.   

*Lengd Fjarðarheiðarganga,  12-13 km, er engin  fyrirstaða í gangagerð í  dag. Lærdalsgöngin í Noregi sem eru helmingi lengri 24 km. voru opnuð  fyrir 17 árum.  Nýlega  er hafin framkvæmd á  Rogfastgöngum 27km löngum neðansjávargöngum í Noregi. Færeyingar eru byrjaðir á rúmlega 12 km löngum neðansjávargöngum og eru með í undirbúningi til Sandeyjar neðansjávargöng sem verða enn lengri.

*Öllu tali um að Fjarðarheiðargöng, sem næstu göng, þjóni ekki hagsmunum alls Austurlands einungis Seyðfirðingum, er vísað til föðurhúsanna með vísan í framanritaðar staðreyndir.  Ekki er talað um að Norðfjarðargöng þjóni bara hagsmunum Norðfirðinga enda fráleitt að setja slíkt fram.  Öruggar heilsárs samgöngur eru nútíma mannréttindi.

*Seyðfirðingar sækja í vaxandi mæli þjónustu til Fljótsdalshéraðs sem er miðstöð verslunar, þjónustu og samganga  á Austurlandi.  Samvinna og samgangur hefur og er því mikill milli sveitarfélaganna.  Vaxandi  áhugi á báðum stöðum er fyrir að skoða enn frekari samvinnu og sameiningu sveitarfélaganna.  M.a. hefur verð rætt um að kalt neysluvatn og heitt vatn frá Hitaveita EF tengist til Seyðisfjarðar í gegnum Fjarðarheiðargöng en kaupstaðurinn fellur undir svonefnd „köld svæði“.

*Sveitarfélögin á Austurlandi hafa með árlegum samþykktum sínum (SSA  2014-2015-2016) um jarðgöng á Austurlandi  ályktað  að Fjarðarheiðargöng verði forgangsverkefni að loknum Norðfjarðargöngum.  Það er svo ítekað í nýrri,samhljóða, samþykkt stjórnar SSA frá 29. ág. sl. Þingmenn Austurlands allir sem einn hafa stutt þá forgangsröðun.

*Niðurstaðan að velja  Fjarðarheiðargöng, sem nú þegar er í samgönguáætlun, byggir á ítarlegri umfjöllun Austfirðinga og fagaðila til fjölda ára og samanburða á lausnum á samgöngumálum á Austurlandi með heildarsýn á málaflokkinn í huga.  Vilji Seyðfirðinga, bæjarstjórnar Seyðisfjarðar og sveitarfélaga á Austurlandi er að samgönguyfirvöld og Alþingi Íslendinga virði þessa niðurstöðu.                                                                                        

Við undirritaðir óskum öllum  Austfirðingum til hamingju með opnun Norðfjarðar-ganga nú í haust.  Norðlendingum með opnun Vaðlaheiðarganga þegar þar að kemur. Einnig Vestfirðingum nú við upphaf Dýrafjarðarganga.

                                         Í upphafi septembermánaðar 2017.

Fyrrv.. og núverandi  bæjarstjórar Seyðisfjarðarkaupstaðar.

Jónas Hallgrimsson  bæjarstjóri  1974-1984

Þorvaldur Jóhannsson bæjarstjóri 1984-1998

Ólafur Hr. Sigurðsson   bæjarstjóri 1998-2002 og 2006-2011

Tryggvi Harðarson  bæjarstjóri  2002-2006

Vilhjálmur Jónsson  bæjarstjóri frá  2011

0

Engin athugasemd, vertu fyrst/ur...

Skildu eftir athugasemd


*